ربط دومين مخصص بمدونتك على بلوجر هو واحدة من أهم الخطوات اللي بتفصل بين مدوّن هاوي ومدوّن ناوي يبني مشروع حقيقي. الدومين مش مجرد رابط شكله حلو، ده عنصر أساسي بيأسس لمصداقيتك قدام الزوار، وبيعكس إنك جاد في اللي بتقدمه. كمان وجود دومين خاص بيك بيزود فرصك في القبول في جوجل أدسنس لو بتخطط تبدأ تربح من التدوين.
العملية مش صعبة أبدًا، بس محتاجة تتعمل بهدوء وبالترتيب الصح. في المقال ده، هنشرحلك الموضوع بخطواته البسيطه علشان توصل في النهاية لمدونة شغالة باسمك وبشكل احترافي يليق بيك.
شراء دومين والاستعداد لربطه في مدونتك
أول خطوة علشان تقدر تربط دومين مخصص بمدونة بلوجر، هي إنك تشتري دومين مدفوع من موقع موثوق زي Namecheap أو GoDaddy أو Google Domains (لو متاح في بلدك). حاول تختار اسم سهل، واضح، ويعبر عن محتوى مدونتك، ويفضل يكون قصير علشان الناس تفتكره بسهولة.
بعد ما تشتري الدومين، متستناش كتير، افتح مدونتك على بلوجر، وادخل على لوحة التحكم، ومن القائمة الجانبية اختار "الإعدادات"، وبعدها انزل لجزء "النشر". هتلاقي رابط مدونتك الحالي من نوع yourname.blogspot.com، و بعده زر "إعداد عنوان نطاق مخصص" أو "Custom Domain"، اضغط عليه، واكتب الدومين الجديد اللي اشتريته، لكن خد بالك: لازم تكتبه بالكامل ويبدأ بـ www، يعني تكتبه كده: www.yourdomain.com. لو كتبته من غير www، بلوجر مش هيقبل الرابط وهتظهرلك رسالة خطأ.
إعداد سجلات DNS وربط الدومين
بعد ما تكتب الدومين وتضغط حفظ، هتظهرلك رسالة من بلوجر فيها بيانات مهمة جدًا، ودي اللي هنستخدمها في موقع الدومين علشان نربط الاتنين ببعض.
الرسالة دي هتكون فيها سجلين CNAME: الأول هو "www" وده ثابت، وتوجيهه بيكون لـ ghs.google.com. أما التاني فهو سجل مخصص بيتولد مخصوص ليك وبيكون عبارة عن كودين – اسم وقيمة – وهما اللي بيثبتوا إنك صاحب الدومين فعلًا. انسخ السجلين دول وخليهم على جنب.
دلوقتي تروح لموقع الدومين اللي اشتريت منه، وتفتح إعدادات DNS أو إدارة النطاق، وهناك هتبدأ تضيف السجلات اللي بلوجر طلبها. أول حاجة هتضيف سجلين CNAME بالمعلومات اللي نسختها. بعد كده، ودي خطوة مهمة، هتضيف 4 سجلات A (كلهم بنفس الاسم: @)، والسجلات دي أرقام ثابتة من جوجل وهي:
- 216.239.32.21
- 216.239.34.21
- 216.239.36.21
- 216.239.38.21
الهدف من السجلات دي هو ضمان إن الدومين يشتغل سواء حد كتب www أو لأ. لو لقيت في الموقع سجلات قديمة بنفس الاسم، امسحها قبل ما تضيف الجديدة، ويفضل تحفظ التغييرات بعد كل خطوة.
حفظ الربط وتفعيل HTTPS
بعد ما تضيف كل سجلات DNS، هتحتاج تنتظر شوية، ساعات التحديث بيحصل في خلال 5 دقايق، وساعات بياخد أكتر، لحد 24 ساعة. بمجرد ما تعدي فترة التحديث، ارجع على بلوجر واضغط على "حفظ" تحت الدومين، وهتلاقي الربط تم بنجاح لو كل البيانات صح. بمجرد ما الربط يشتغل، فيه خطوة ضرورية لازم تعملها وهي تفعيل الحماية https، ودي بتخلي مدونتك أكثر أمانًا ومحببة لمحركات البحث. من نفس صفحة الإعدادات، انزل لجزء "HTTPS"، وفعل الخيارين: "توفير HTTPS" و"إعادة التوجيه إلى HTTPS". بمجرد تفعيلهم، موقعك هيشتغل برابط مؤمن، وهيظهر للزوار بعلامة القفل اللي بتدل على الأمان.